Job: seerkry...

Job: seerkry...

Job 1:13-19

Hy was nog aan die praat, toe kom daar nog een met die nuus: “U seuns en dogters was besig om te eet en wyn te drink in die huis van hulle oudste broer. Meteens het daar 'n sterk wind van die woestyn se kant af opgekom en die huis van al vier kante af op u kinders omgewaai. Almal is dood. Net ek het weggekom om dit vir u te vertel.”

In een dag het Job letterlik alles verloor: sy beeste, kleinvee, kamele, maar ook al tien sy kinders.  In een dag het Job verander van een van die rykste mense van sy tyd na een van die armste en stukkendste mense van sy tyd. Hy het ontdek dat die lewe ‘n mens soms bitter seer kan maak. Die rykdom wat ek vandag het kan môre weg wees: ‘n mens se besittings, jou geseondheid, jou gesin, jou lewe.  Job doen wat mense wat rou in daardie tyd gedoen het: hy skeur sy klere, skeer sy hare af en gaan lê plat op die grond. Hy is stukkend. Die Here se kinders kry nie minder seer as ander mense nie. Wanneer hulle seerkry, rou hulle soos alle ander mense.  Dink maar aan Jakob wat die nuus kry dat sy jongste seun Josef dood is; of Naomi wat terugkom na Betlehem nadat haar man en twee seuns dood is; of Hiskia wat die tyding kry dat hy gaan sterf. Dink maar aan koning Dawid wiese klein kindjie doodsiek is en uiteindelik sterf. Ja, die lewe kan ‘n mens baie seer maak. Die Here se kinders is nie hierdie seer gespaar nie – hulle kry net so seer soos alle ander mense. Hulle beleef dieselfde fases van verlies wat alle ander mense beleef. Hulle lê ook soms met geskeurde klere en uitgestrekte  hande plat op die grond.

Here, die lewe maak ons ook baie keer seer. Hoor ons en help ons wanneer met ons geskeurde klere plat op die grond voor U kom lê. Dankie dat U ook in sulke tye by ons is. Amen.

- Geskryf vir die manne-dagboek: Manne van die Woord (2018)