My reis met God en mense

Vrydag refleksie - 28 November Die wêreld is aan die brand. Letterlik. Vir dae lank hang die wit rook oor land en see. Gansbaai is al dae lank sonder krag en internet. Die brande het alles verwoes: kragdrade, internet kabels, fynbos, bye...alles. Vuur en vlamme is genadeloos; dit verteer alles. Dis nie net in Gansbaai nie. Ry jy oor die berg Kaap toe, sien jy die vlamme en digte rook oor die berg. Laas week het die berge bo Botrivier gebrand. In Danabaai leef die mense in vrees vir die vlamme wat al hoe nader kom. En in die Tsitsikamma het die brande die stok-ou Morawiese kerkie verwoes. Vuur en vlamme vra nie vrae nie - dit reduseer alles wat mooi was tot dooie, swart as. Vra maar vir die mense in Hong Kong. Ja, die wêreld is letterlik aan die brand. 'n Mens kan nie help om te wonder hoe die brande amper gelyktydig oral ontstaan nie. Dalk is daar natuurlike oorsake; dalk nalatigheid of selfs brandstigting. Kan 'n gesonde, rasionele mens trots voel op 'n berg wat afgebrand ...

Vrydag refleksie - 21 November Dit was nog altyd lekker om in 'n parkie te speel: klimrame, perde, swaaie, glyplanke en goeters wat vinnig draai. Ek het die meeste gehou van die goeters wat vinnig draai - ek dink die meeste seuns doen. Ons het 'n groot "kick" daaruit gekry om dit so vinnig te draai dat die meisies bang word.  Ek het nogal lanklaas in 'n parkie gespeel. Dit sal seker snaaks lyk as 'n oom van 58 in 'n parkie speel en van die glyplank afgly. Maar 'n mens mis die speel. Grootmense speel te min. Deesdae speel kinders ook te min. Ek dink deesdae weer baie aan die goeters wat so vinnig draai. Dit voel soms vir my of die lewe ook so is. Hy draai vinnig - al hoe vinniger. Jy moet net vasklou. Hierdie tyd van die jaar draai hy so vinnig dat 'n mens (soos die meisies in die parkie) so effens bang word. Ons hoor dikwels die woord "rat-race", die malle gejaag, die eindelose gejaag. En 'n mens klou verbete vas want jy mag nie afval...

Vrydag refleksie - 14 November Die afgelope tyd was ‘n groot toets vir die Rooms Katolieke kerk. Die groot vraag was of Maria betrokke is in die redding van die wêreld. Sekere groepe wou so ver gaan as om te sê dat Maria amper soos ‘n mede-verlosser was. Almal van ons wat die storie gevolg het, het asem opgehou om te hoor wat die nuwe pous sou sê. Dit sou fataal wees as Maria die status van ‘n mede-verlosser moes kry, want die Bybel sê daar is geen ander naam waardeur mense gered kan word as Jesus se naam (Hand 4:12). Genadiglik het die Here vir Pous Leo XIV die wysheid gegee om hierteen te besluit. Hy het bevestig dat Jesus alleen die Verlosser is, en dat Maria geen rol speel in die verlossing nie – buiten dat sy vir Jesus in die wêreld gebring het. Hy het ook gevra dat gelowiges ophou praat van Maria as “co-redeemer” or “co-redemptrix”. Ek is dankbaar vir Pous Leo se besluit en verklaring. Dit val ‘n mens op hoedat mense sukkel om te aanvaar dat Jesus alleen die Redder en...

Vrydag refleksie - 7 November Ons moes, as naaste familie, hierdie week 'n moeilike besluit neem: om voort te gaan met mediese ondersteuning of om die masjiene geleidelik af te skakel. Tersia se oom (oom Boetie) is reeds vir twee maande in 'n hospitaal in Pretoria. In hierdie twee maande het haar oom net al hoe swakker geword - hy kan nie meer leef sonder die hulp van masjiene nie. Dit bly een van die moeilikste keuses om te maak. Ons bid al vir die laaste maand dat die Here hom moet kom haal en verlos van die lyding en die gebroke aardse bestaan - sonder dat ons 'n besluit moes neem. Sy tentwoning het baie stukkend geraak (2 Kor 5). Oom Boetie het 'n oorerflike oogsiekte wat hom vroeg in sy lewe laat blind word het. Ek kan my nie indink hoe dit moet wees om altyd in die donker te wees nie. Ten spyte van die blindheid het hy 'n mooi en vol lewe geleef. Enige oomblik van nou af kom die Here hom haal, tensy daar 'n wonderwerk gebeur en die Here hom ges...