Die wêreld is aan die brand....

Vrydag refleksie - 28 November

Die wêreld is aan die brand. Letterlik. Vir dae lank hang die wit rook oor land en see. Gansbaai is al dae lank sonder krag en internet. Die brande het alles verwoes: kragdrade, internet kabels, fynbos, bye...alles. Vuur en vlamme is genadeloos; dit verteer alles.

Dis nie net in Gansbaai nie. Ry jy oor die berg Kaap toe, sien jy die vlamme en digte rook oor die berg. Laas week het die berge bo Botrivier gebrand. In Danabaai leef die mense in vrees vir die vlamme wat al hoe nader kom. En in die Tsitsikamma het die brande die stok-ou Morawiese kerkie verwoes. Vuur en vlamme vra nie vrae nie - dit reduseer alles wat mooi was tot dooie, swart as. Vra maar vir die mense in Hong Kong.

Ja, die wêreld is letterlik aan die brand. 'n Mens kan nie help om te wonder hoe die brande amper gelyktydig oral ontstaan nie. Dalk is daar natuurlike oorsake; dalk nalatigheid of selfs brandstigting. Kan 'n gesonde, rasionele mens trots voel op 'n berg wat afgebrand het? Kan dit lekker wees om te sien hoe alles wat mooi is afbrand? Ja, dis moontlik wanneer daar niks mooi in jouself is nie.

Ons het die laaste ruk amper gewoond geraak aan die geluid van noodvoertuie en die reuk van afgebrande fynbos. 'n Mens sidder as jy dink aan al die insekte, voëls, goggas en diere wat in die slag bly. Die skade is onberekenbaar.

So jaar of wat gelede het ons eie vallei ook deurgeloop onder die brande. Intussen het alles weer begin groei en is die vallei weer mooier en groener. Die Skepper het 'n natuurlike neiging tot restourasie in Sy skepping ingebou. Swart velde word mettertyd weer groen; alles wat dood is word weer vervang deur lewe. Alles bly nie vir altyd dood nie.

Ons sien dit ook in ons eie liggame. Seer plekke word weer gesond; wonde heel met verloop van tyd; trane word weer vreugde. Agter dit alles is die groot God aan die werk. Hy verander woestyne in grasvlaktes (Ps 107:35), Hy laat affodille groei waar alles dood was (Jes 35:1). Hy laat mense wat gehuil het weer lag (Ps 30:6). Hy gee vir die verbitterde Naomi weer nuwe vreugde en lewensin (Rut 4:14-17). 

As God al die velde wat afgebrand het weer met tyd kan laat herleef, dink net wat Hy vir jou kan doen. Hy het iets in jou ingeskep wat altyd weer wil opstaan, herleef, nuut word en groei. Hy gee vir jou die krag om voort te gaan - selfs ná die donkerste tye en grootste verliese. 

Mag jy 'n nuwe seisoen van God se genade beleef. Mag alles in jou wat dood was, weer lewe. Mag jy blom en vrugte dra en sommer net mooi wees...

Mooi dag!
Coenie

Comments

Post a Comment

Popular posts from this blog

Reünie

Image
Dis 6uur Saterdagoggend – ek sit in my kantoor. Ek moet werk aan more-oggend se erediens. Gisteraand se Reünie maal in my kop. Ek het lanklaas so lekker gelag en ek het mense sien lag wat lanklaas gelag het. Dit was bevrydend. Ons het gelag vir die lewe, vir onsself, vir die ander mense. Lag doen ’n mens goed. Maar ek het ’n paar keer amper ook gehuil. Die reünie wat Dana Snyman beskryf en Frank Opperman so meesterlik opgevoer het, vertel vir ons iets van ons eie wêreld – ’n baie stukkende wêreld. Die prentjie van die verskillende mense by die reünie is ’n prentjie van ons eie wêreld – selfs van ons eie dorp. Dit ruk ons weg van die religieuse kerkwêreld waarin so maklik ’n kokon-betaan voer na ’n wêreld waar almal nie so “ok” is nie. Boesman se storie het my in die hart gegryp. Ek dra maandeliks by vir ’n fonds vir oud weermaglede, soos hy, wat nie kan “cope” nie. Sy taal en swetswoorde het my nie afgesit nie – dis hoe daardie manne praat. Die oorlog het hulle geleer om so te praat....
Read more

God se hande

God se hande ‭‭PSALMS‬ ‭89:14‬ "U het 'n magtige arm, sterk is u hand, kragtig u regterhand". Hande fassineer my. Ek kyk graag na mense se hande. Elke mens se hande lyk en voel anders. Soms vertel mense se hande iets van hulle lewensstorie. Mans wat met hulle hande werk, het dikwels groot, growwe hande. Musikante het dikwels fyner, sagter hande.  Ek sal nooit oom Jantjie se hande vergeet nie. Hy was diep in die tagtigs. Wanneer ek hom met die hand groet, het my hande weggeraak in sy reuse hande. Maar dit was die sagste hande wat ek ooit by 'n man gesien het. Liefdevolle hande. Oom Kinnie se hande was groot en sterk. Hy het vroeër in die myn gewerk en daarna met yster gewerk. Dit was sterk maar liefdevolle hande - hande wat jou laat veilig voel het. My ma se hande was krom en effens verwronge. Jare se artritis het haar klein sagte hande verander in ongemaklike, seer hande. Dit was hande wat hard gewerk het en alles vir haar kinders gedoen het. Die Bybel praat dikwels v...
Read more