Maak tyd om te rus

Vrydag refleksie - 21 November

Dit was nog altyd lekker om in 'n parkie te speel: klimrame, perde, swaaie, glyplanke en goeters wat vinnig draai. Ek het die meeste gehou van die goeters wat vinnig draai - ek dink die meeste seuns doen. Ons het 'n groot "kick" daaruit gekry om dit so vinnig te draai dat die meisies bang word. 

Ek het nogal lanklaas in 'n parkie gespeel. Dit sal seker snaaks lyk as 'n oom van 58 in 'n parkie speel en van die glyplank afgly. Maar 'n mens mis die speel. Grootmense speel te min. Deesdae speel kinders ook te min.

Ek dink deesdae weer baie aan die goeters wat so vinnig draai. Dit voel soms vir my of die lewe ook so is. Hy draai vinnig - al hoe vinniger. Jy moet net vasklou. Hierdie tyd van die jaar draai hy so vinnig dat 'n mens (soos die meisies in die parkie) so effens bang word. Ons hoor dikwels die woord "rat-race", die malle gejaag, die eindelose gejaag. En 'n mens klou verbete vas want jy mag nie afval nie.

Die Prediker het lank terug geskryf dat dit eintlik net 'n gejaag na wind is (1:14). Dit bevredig nie regtig nie; dit maak 'n mens moeg. Die meeste van ons is hierdie tyd van die jaar moeg. Daarom het hy (die Prediker) al hoe meer sin begin vind in die klein, gewone oomblikke in die lewe (Pred 9:7-9).

Heel aan die begin, toe God geskep het, het Hy ses dae lank geskep en op die sewende dag gerus (Gen 1). Hy het dit ook ingestel as gereelde rusdag vir ons. Die doel van die sewende dag was om te rus. Dit was 'n geskenk. Deesdae is selfs die rusdag vol verpligtinge, sport, inkopies en baie meer. Ons rus nie meer nie. Dis 'n ewige rotresies.

Ons sal weer moet leer om te rus. Afskakel. Stadiger leef. In elke werksplek is daar diegene wat in elk geval stadig leef - ek praat nie van hulle nie - ek is soms effens jaloers op hulle. Hulle sal moet leer om bietjie vinniger te leef. Maar vir almal wat alles gee, hard werk, en sommer net moeg voel: maak tyd om te rus. Klim vir 'n oomblik af van die goeters wat so vinnig ry. Drink 'n koffie, kyk 'n fliek, sit in jou tuin of lê sommer net op jou bed.

Ek bid sommer vanoggend vir elkeen wat saam met my voel dat die goeters bietjie te vinnig ry. Mag die Here vir jou krag gee vir vandag. En mag jy iewers, sommer net vir 'n paar minute, afklim en rus. Sterkte! 

Mooi dag!
Coenie

Comments

Post a Comment

Popular posts from this blog

Reünie

Image
Dis 6uur Saterdagoggend – ek sit in my kantoor. Ek moet werk aan more-oggend se erediens. Gisteraand se Reünie maal in my kop. Ek het lanklaas so lekker gelag en ek het mense sien lag wat lanklaas gelag het. Dit was bevrydend. Ons het gelag vir die lewe, vir onsself, vir die ander mense. Lag doen ’n mens goed. Maar ek het ’n paar keer amper ook gehuil. Die reünie wat Dana Snyman beskryf en Frank Opperman so meesterlik opgevoer het, vertel vir ons iets van ons eie wêreld – ’n baie stukkende wêreld. Die prentjie van die verskillende mense by die reünie is ’n prentjie van ons eie wêreld – selfs van ons eie dorp. Dit ruk ons weg van die religieuse kerkwêreld waarin so maklik ’n kokon-betaan voer na ’n wêreld waar almal nie so “ok” is nie. Boesman se storie het my in die hart gegryp. Ek dra maandeliks by vir ’n fonds vir oud weermaglede, soos hy, wat nie kan “cope” nie. Sy taal en swetswoorde het my nie afgesit nie – dis hoe daardie manne praat. Die oorlog het hulle geleer om so te praat....
Read more

God se hande

God se hande ‭‭PSALMS‬ ‭89:14‬ "U het 'n magtige arm, sterk is u hand, kragtig u regterhand". Hande fassineer my. Ek kyk graag na mense se hande. Elke mens se hande lyk en voel anders. Soms vertel mense se hande iets van hulle lewensstorie. Mans wat met hulle hande werk, het dikwels groot, growwe hande. Musikante het dikwels fyner, sagter hande.  Ek sal nooit oom Jantjie se hande vergeet nie. Hy was diep in die tagtigs. Wanneer ek hom met die hand groet, het my hande weggeraak in sy reuse hande. Maar dit was die sagste hande wat ek ooit by 'n man gesien het. Liefdevolle hande. Oom Kinnie se hande was groot en sterk. Hy het vroeër in die myn gewerk en daarna met yster gewerk. Dit was sterk maar liefdevolle hande - hande wat jou laat veilig voel het. My ma se hande was krom en effens verwronge. Jare se artritis het haar klein sagte hande verander in ongemaklike, seer hande. Dit was hande wat hard gewerk het en alles vir haar kinders gedoen het. Die Bybel praat dikwels v...
Read more