Job: maklike antwoorde...

Job: maklike antwoorde...

Job  42:7

Nadat Hy met Job gepraat het, het die Here vir Elifas die Temaniet gesê: “Ek is kwaad vir jou en jou twee vriende, want julle het nie die waarheid oor My gepraat soos my dienaar Job nie.

Job se verhaal is nie maklik om te verstaan nie. Daar is ‘n komp moeilike dinge in die boek Job.  Waarom laat die Here die Satan toe om Job so seer te maak? Hoe kan die Here so ‘n gesprek en onderhandeling met die Satan hê? Dis moeilike vrae, en laat christene en teoloë deur die eeue nog kopkrap. Job se vriende het nie geweet wat agter die skerms gebeur nie (ons is gelukkig om dit wel te weet omdat dit vir ons neergeskryf is). Al wat hulle gesien het is dat daar skielik klomp slegte goed met hulle vriend Job gebeur. Binne hulle verwysingsraamwerk kon daar net een oorsaak wees: Job moes iets veskrikliks verkeerd gedoen het. Hulle raad was eenvoudig: bely jou sonde en dan sal die Here ophou om jou te straf.  Dit klink baie mooi, maar dis nie waar nie, want ons weet vandag dat dit nie die rede is waarom al hierdie slegte dinge met Job gebeur het nie. Dit het niks te doen gehad met enige sonde wat Job gedoen het nie.

Mense is baie lief daarvoor om maklike antwoorde te gee. Dikwels klink hierdie antwoorde baie vroom en godsdienstig, maar dis doodgewoon nie die regte antwoorde nie.  Soms maak hierdie antwoorde baie seer. Die ergste van alles is dat dit dikwels ‘n verwronge prentjie skets van wie God regtig is. Sonder dat mense dit bedoel, sê hulle iets oor God wat doodgewoon nie waar is nie. Ons moet leer om nie alles te glo wat mense in die Naam van die Here sê nie. Ons moet self ook versigtig wees om nie antwoorde te gee wat doodgewoon nie waar is nie, hoe mooi dit ookal mag klink.

Here, keer ons om nie vir mense maklike antwoorde te gee nie. Help ons om nie dinge oor U te sê wat nie waar is nie. Help ons ook om nie alles te glo wat ander mense oor U sê nie. Amen

- Geskryf vir die manne-dagboek: Manne van die Woord (2018)