23 September 2025

Vandag is die 23e September. Dit gons omtrent oor die 23e September 2025. Dis interessant watter rol die 23e/24e September in die huidige voorspellings speel. In die Joodse kalender is dit die 1e Tisjrie (Lev 23:24). Op hierdie dag vier die Jode die Roosj Hasjana of die begin van die nuwe jaar. (In Exodus 12:2 sê die Here egter die maand Nisan is die eerste maand en die begin van hulle jaar. Die maand Tisjrie is die 7e maand). 

Die Jode vier ook vandag die fees van die trompette (Lev 23:24). Omdat die groot trompet gaan blaas as Jesus terugkom (1 Tes 4:16), word die afleiding gemaak dat Jesus dalk op hierdie dag gaan terugkom of dat die "wegraping" op hierdie dag gaan plaasvind.

Die probleem bly maar dat ons op allerlei maniere wil somme maak en uitwerk wanneer Jesus gaan kom - iets waarteen Jesus self ons uitdruklik gewaarsku het om nie te doen nie. Hy het oor en oor gesê dat niemand weet nie (Mat 24:36,42,44).

Ek het al baie gewonder wat 'n mens sou doen as jy hoor dat 'n groot meteoriet die aarde oor twee dae tref en alles gaan vernietig. Sou dit help om dit te weet? Sou dit beter wees om dit te weet of nie te weet nie? Wat sal jy doen as jy dit sou weet? Dalk vir almal vir wie jy seergemaak het jammer sê? Of spesiale tyd saam met jou huweliksmaat en kinders deurbring? Of van jou rykdom weggee? Of regmaak met die Here?

Ons lewe kan altyd op enige oomblik ophou - dis elke dag 'n nare realiteit. Al wat ons het is vandag. Daarom moet 'n mens elke dag leef asof dit jou laaste dag is. Sê vandag jammer, vra vergifnis en gee vergifnis, wees lief vir almal om jou, deel jou oorvloed met ander en breek met elke sonde in jou lewe. Aanvaar Jesus as jou Verlosser en Here. Dan sal jy gereed wees vir wat ookal gebeur - ook vir 'n lang lewe op die aarde. Party mense is gereed om te sterf maar nie gereed om te leef nie.

Die kort en lank van alles: Hou op somme maak en leef elke dag voluit. Koester elke oomblik en leef in die oomblik. Wees lief vir God en wees lief vir die mense op jou pad. Lag, vergewe en spreek vry. En reik uit na mense wat nie gereed is nie: vertel hulle van God se liefde en genade sodat hulle ook gereed kan wees.

En as jy dit alles doen, is 23 September 'n dag soos alle ander dae - 'n gawe uit God se hand. Carpe Diem - gryp die dag!

Mooi dag!
Coenie

Comments

Post a Comment

Popular posts from this blog

Reünie

Image
Dis 6uur Saterdagoggend – ek sit in my kantoor. Ek moet werk aan more-oggend se erediens. Gisteraand se Reünie maal in my kop. Ek het lanklaas so lekker gelag en ek het mense sien lag wat lanklaas gelag het. Dit was bevrydend. Ons het gelag vir die lewe, vir onsself, vir die ander mense. Lag doen ’n mens goed. Maar ek het ’n paar keer amper ook gehuil. Die reünie wat Dana Snyman beskryf en Frank Opperman so meesterlik opgevoer het, vertel vir ons iets van ons eie wêreld – ’n baie stukkende wêreld. Die prentjie van die verskillende mense by die reünie is ’n prentjie van ons eie wêreld – selfs van ons eie dorp. Dit ruk ons weg van die religieuse kerkwêreld waarin so maklik ’n kokon-betaan voer na ’n wêreld waar almal nie so “ok” is nie. Boesman se storie het my in die hart gegryp. Ek dra maandeliks by vir ’n fonds vir oud weermaglede, soos hy, wat nie kan “cope” nie. Sy taal en swetswoorde het my nie afgesit nie – dis hoe daardie manne praat. Die oorlog het hulle geleer om so te praat....
Read more

God se hande

God se hande ‭‭PSALMS‬ ‭89:14‬ "U het 'n magtige arm, sterk is u hand, kragtig u regterhand". Hande fassineer my. Ek kyk graag na mense se hande. Elke mens se hande lyk en voel anders. Soms vertel mense se hande iets van hulle lewensstorie. Mans wat met hulle hande werk, het dikwels groot, growwe hande. Musikante het dikwels fyner, sagter hande.  Ek sal nooit oom Jantjie se hande vergeet nie. Hy was diep in die tagtigs. Wanneer ek hom met die hand groet, het my hande weggeraak in sy reuse hande. Maar dit was die sagste hande wat ek ooit by 'n man gesien het. Liefdevolle hande. Oom Kinnie se hande was groot en sterk. Hy het vroeër in die myn gewerk en daarna met yster gewerk. Dit was sterk maar liefdevolle hande - hande wat jou laat veilig voel het. My ma se hande was krom en effens verwronge. Jare se artritis het haar klein sagte hande verander in ongemaklike, seer hande. Dit was hande wat hard gewerk het en alles vir haar kinders gedoen het. Die Bybel praat dikwels v...
Read more