Dokters en dinge

Vrydag refleksie - 3 Oktober

Die boek Lukas, is deur 'n mediese dokter geskryf (Kol 4:14). Iemand sê onlangs vir my dat dit 'n wonderwerk is dat ons enigsins Lukas kon lees - die meeste dokters se voorskrifte (en boeke) sou onleesbaar wees.

Ek was die afgelope tyd self ook 'n hele paar keer by die dokters. Dikwels weet 'n mens self wat fout is. Jy weet jy het verkoue of griep - jy benodig net die voorskrif. Maar soms het jy nie 'n idee wat fout is nie. Jy het reeds alles probeer. Dis in sulke tye wat 'n mens staatmaak op die dokter se kennis en ervaring. En jy hoop (en bid) dis goeie nuus. Soos wat 'n mens ouer word besef jy terdeë dat enige toets positief of negatief kan wees - dit maak 'n mens bang.

Ek sê altyd vir die Here dankie vir elke toets wat negatief is; vir elke gogga wat ek nie het nie. En soms voel dit of daar net meer en meer goggas is. Ek weet nie of die goggas meer word en of dit net name gekry het nie, maar dis angswekkend om te hoor van al die (nuwe) goggas. 

Dis wonderlik dat dokter Lukas in Jesus geglo het - selfs 'n hele boek oor Hom geskryf het. Dis kosbaar dat hy (as dokter) so opgewonde is oor Jesus se wonderwerke en van soveel wonderwerke vertel. Dis steeds lekker om te weet as jou dokter ook in Jesus glo, en opgewonde is oor Sy wonderwerke. Ek voel altyd bietjie veiliger by 'n dokter wat die Here ken. 

Terwyl ek Woensdag oggend by die dokter sit, sê ek vir die Here dankie vir dokters en vir die mediese wetenskap. Ek stem nie noodwendig saam met alles in die mediese bedryf nie, soos wat ek nie saamstem met alles in die kerk nie. Maar ek dank die Here vir bloedtoetse, X-straal-masjiene, antibiotika, EKG's en hospitale. 

Ek glo dat God die groot geneesheer is. Hy genees met of sonder dokters. Hy het nie dokters (of dominees) nodig nie, maar Hy gebruik hulle. Hy het selfs 'n dokter gebruik om een van die Evangelies te skryf. Jesus het nie bedreig gevoel deur dokters nie; Hy was ook nie vyandig teenoor dokters nie. Hy gebruik selfs die prentjie van 'n dokter en sê dat gesonde mense nie 'n dokter nodig het nie; siek mense het wel. Net so het Hy nie gekom vir mense sonder sonde nie maar vir sondaars (Luk 5:31).

Ons leef in 'n bevoorregte tyd. Dis goeie tye: hartoorplantings, heupvervangings, pasaangeërs, kogleêre inplantings, kunsmatige ledemate en proefbuisbabas. Ek dank die Here vandag vir dokters, hospitale, apteke, mediese navorsing en die mediese bedryf. Ek bid dat hulle altyd sal onthou dat hulle ook net nederige diensknegte moet wees. 

Agter alles sien ek die groot Geneesheer. Hy het gate in Sy hande en 'n spieswond in Sy sy. Sy liggaam is stukkend - soos joune en myne. Net Hy kan gesond maak. Hy ken jou liggaam, jou psige en jou hart. Hy genees nie net liggame nie; Hy genees ook harte. Soos die melaatse man in Mat 8 sê ons ook: "As U wil, kan U my gesondmaak". Wie weet, dalk sê Hy vir jou en my dieselfde woorde as vir daardie melaatse man:"Ek wil. Word gesond!" (Mat 8:1-4).

Mooi dag,
Coenie

Comments

Post a Comment

Popular posts from this blog

Reünie

Image
Dis 6uur Saterdagoggend – ek sit in my kantoor. Ek moet werk aan more-oggend se erediens. Gisteraand se Reünie maal in my kop. Ek het lanklaas so lekker gelag en ek het mense sien lag wat lanklaas gelag het. Dit was bevrydend. Ons het gelag vir die lewe, vir onsself, vir die ander mense. Lag doen ’n mens goed. Maar ek het ’n paar keer amper ook gehuil. Die reünie wat Dana Snyman beskryf en Frank Opperman so meesterlik opgevoer het, vertel vir ons iets van ons eie wêreld – ’n baie stukkende wêreld. Die prentjie van die verskillende mense by die reünie is ’n prentjie van ons eie wêreld – selfs van ons eie dorp. Dit ruk ons weg van die religieuse kerkwêreld waarin so maklik ’n kokon-betaan voer na ’n wêreld waar almal nie so “ok” is nie. Boesman se storie het my in die hart gegryp. Ek dra maandeliks by vir ’n fonds vir oud weermaglede, soos hy, wat nie kan “cope” nie. Sy taal en swetswoorde het my nie afgesit nie – dis hoe daardie manne praat. Die oorlog het hulle geleer om so te praat....
Read more

God se hande

God se hande ‭‭PSALMS‬ ‭89:14‬ "U het 'n magtige arm, sterk is u hand, kragtig u regterhand". Hande fassineer my. Ek kyk graag na mense se hande. Elke mens se hande lyk en voel anders. Soms vertel mense se hande iets van hulle lewensstorie. Mans wat met hulle hande werk, het dikwels groot, growwe hande. Musikante het dikwels fyner, sagter hande.  Ek sal nooit oom Jantjie se hande vergeet nie. Hy was diep in die tagtigs. Wanneer ek hom met die hand groet, het my hande weggeraak in sy reuse hande. Maar dit was die sagste hande wat ek ooit by 'n man gesien het. Liefdevolle hande. Oom Kinnie se hande was groot en sterk. Hy het vroeër in die myn gewerk en daarna met yster gewerk. Dit was sterk maar liefdevolle hande - hande wat jou laat veilig voel het. My ma se hande was krom en effens verwronge. Jare se artritis het haar klein sagte hande verander in ongemaklike, seer hande. Dit was hande wat hard gewerk het en alles vir haar kinders gedoen het. Die Bybel praat dikwels v...
Read more