In my lewe (Matthys Roets)

Dagstukkie - 7 Oktober 2025

Matthys Roets sing 'n baie mooi lied met die titel "In my lewe". Dis aangrypend omdat hy dit sing terwyl hy in sy rolstoel ry en as't ware terugdink aan alles wat in sy lewe gebeur het. Dit voel asof Matthys die lied oor sy eie lewe geskryf het.

Die lied is egter geskryf deur Nardus du Plooy in 1999 en nie deur Matthys self nie. Matthys se lewensverhaal maak dit egter aangrypend. Hierdie lied is selfs opgeneem in die FAK Liedjietuin.

Hierdie lied is spesiaal omdat dit nie net oor Matthys se lewe gaan nie, maar oor elkeen van ons se lewe. Elkeen van ons het hoogtepunte bereik, verlief geraak op iemand, mooi plekke gesien, en ons hoop om ander mooi plekke nog te sien. Baie van ons ouer manne het ook die ystervuis van die mag gevoel. Elkeen van ons wat in Hermanus se see geswem het sal ook kan sê dis die "coolste" (of dalk die koelste?) ding wat ons nog gedoen het. Baie van ons sal ook kan sê dat ons foute gemaak het, mense verdink en seergemaak het. En ons almal het ook mense verloor - dis die laaste ding waaroor ons wou sing.

Elkeen van ons kan ook beaam dat daar dinge en baie mense is waarvan ons hou. Maar die diepste waarheid van hierdie lied lê in die refrein: "Maar ek sukkel met my hart - ja, hy wissel nog gedurig van warm na koud". Max Lucado sluit hierby aan en sê dat ons grootste probleem is 'n hartsprobleem. Die profeet Esegiël skryf ook dat die Here ons klipharte wil vervang met vleisharte (Eseg 36:26). Ons sukkel ook maar met ons harte.

Paulus som dit mooi en eerlik op as hy sê dat hy in 'n tweestryd is: die dinge wat hy wil doen, doen hy nie, en die dinge wat hy nie wil doen nie, dit doen hy (Rom 7:24). Is dit nie waar van my en jou ook nie - ons sukkel met ons harte. Ons "wissel ook gedurig tussen warm en koud". Soms het ons baie liefde; ander tye sukkel ons om lief te hê.

Paulus vra: Wie sal ons van hierdie ewige stryd (doodsbestaan) verlos? Dan antwoord hy: ek dank God - Hy doen dit deur Jesus Christus (Rom 7:24-25). Ons kry dit nie reg nie - daarom sterf Jesus en doen dit in ons plek. Ons dank die Here daarvoor!

Mag jy nog baie mooi dinge in jou lewe beleef; mag jy nog baie mooi plekke sien en nog baie "koel" oomblikke in die Kaapse see beleef. Maar meer as dit: mag jou hart meer dikwels warm as koud wees...

Groete,
Coenie

https://youtu.be/NYi7O47vicA?si=dA-bmEc9erU2cf19

Comments

Post a Comment

Popular posts from this blog

Reünie

Image
Dis 6uur Saterdagoggend – ek sit in my kantoor. Ek moet werk aan more-oggend se erediens. Gisteraand se Reünie maal in my kop. Ek het lanklaas so lekker gelag en ek het mense sien lag wat lanklaas gelag het. Dit was bevrydend. Ons het gelag vir die lewe, vir onsself, vir die ander mense. Lag doen ’n mens goed. Maar ek het ’n paar keer amper ook gehuil. Die reünie wat Dana Snyman beskryf en Frank Opperman so meesterlik opgevoer het, vertel vir ons iets van ons eie wêreld – ’n baie stukkende wêreld. Die prentjie van die verskillende mense by die reünie is ’n prentjie van ons eie wêreld – selfs van ons eie dorp. Dit ruk ons weg van die religieuse kerkwêreld waarin so maklik ’n kokon-betaan voer na ’n wêreld waar almal nie so “ok” is nie. Boesman se storie het my in die hart gegryp. Ek dra maandeliks by vir ’n fonds vir oud weermaglede, soos hy, wat nie kan “cope” nie. Sy taal en swetswoorde het my nie afgesit nie – dis hoe daardie manne praat. Die oorlog het hulle geleer om so te praat....
Read more

God se hande

God se hande ‭‭PSALMS‬ ‭89:14‬ "U het 'n magtige arm, sterk is u hand, kragtig u regterhand". Hande fassineer my. Ek kyk graag na mense se hande. Elke mens se hande lyk en voel anders. Soms vertel mense se hande iets van hulle lewensstorie. Mans wat met hulle hande werk, het dikwels groot, growwe hande. Musikante het dikwels fyner, sagter hande.  Ek sal nooit oom Jantjie se hande vergeet nie. Hy was diep in die tagtigs. Wanneer ek hom met die hand groet, het my hande weggeraak in sy reuse hande. Maar dit was die sagste hande wat ek ooit by 'n man gesien het. Liefdevolle hande. Oom Kinnie se hande was groot en sterk. Hy het vroeër in die myn gewerk en daarna met yster gewerk. Dit was sterk maar liefdevolle hande - hande wat jou laat veilig voel het. My ma se hande was krom en effens verwronge. Jare se artritis het haar klein sagte hande verander in ongemaklike, seer hande. Dit was hande wat hard gewerk het en alles vir haar kinders gedoen het. Die Bybel praat dikwels v...
Read more