Geloftedag

Vrydag refleksie - 19 Desember

Ons het Dinsdag Versoeningsdag gevier. 'n Groot groep mense in ons land herdenk en vier dit steeds as Geloftedag. Duisende mense het Dinsdag by die Voortrekker monument en ander geskiedkundige plekke vergader om hierdie groot dag en gebeure te vier. Baie ander  gedenk dit tuis en bring dit soos 'n Sondag deur.

Op 16 Desember 1838 het 'n groep van 464 Voortrekkers, drie Engelse en talle swart en gekleurde helpers onder leiding van Andries Pretorius die Zoeloe-leërmag (ongeveer 15000-16000) afgeweer en verslaan. Op die aand voor die veldslag het hulle 'n gelofte afgelê dat, indien hulle sou wen, hulle die eer vir die oorwinning aan die Here sal gee. Hulle het ook belowe om hierdie dag elke jaar as 'n sabbat te vier en 'n huis tot die Here se eer te bou.

Daar is 'n diep Bybelse waarheid agter hierdie gebeure wat ons nie mag miskyk nie. God hoor as Sy kinders na Hom roep. Daar is wonderlike verhale in ons land waar die Here ingegryp en gebede verhoor het. In baie ander lande en groepe is daar soortgelyke verhale van God se ingrype. 

Ek dink elkeen van ons sal ook voorbeelde uit ons eie lewens of ons families kan noem waar ons gebid het dat die Here moet uitkoms gee - en Hy het dit gedoen. Dalk was dit langs 'n hospitaalbed, of voor 'n werksonderhoud, mediese toetse, 'n huwelikskrisis of wat ookal. Die Psalmdigter het dikwels vertel hoe Hy na die Here geroep het en die Here Hom gehoor het. Die Israeliete het hulself altyd weer herinner aan God se redding by die Rooisee, die woestyn en die Intog - dink maar aan Jerigo.

'n Mens moet eintlik dagboek of journaal hou van hierdie "reddingdade" van die Here, want ons is geneig om dit te vergeet. Maar 'n mens moet ook jou beloftes en geloftes nakom wat jy in sulke oomblikke maak. Die Prediker herinner ons dat ons ons geloftes moet betaal - die Here hou nie van ligsinnigheid nie (Pred 5:3). Watter beloftes het jy deur die jare aan die Here gemaak? Hou jy dit steeds? Hy was getrou - is jy getrou?

Op Geloftedag sê ek vir die Here dankie vir Sy hand in ons land se geskiedenis - op 16 Desember maar ook in baie ander dinge. Maar ek sê ook dankie vir al die klein "Bloedriviere" in my eie lewe - al die klein, onverdiende oorwinnings. God is getrou - Hy hoor as Sy kinders roep. Hy hoor ook vir jou...

Mooi dag!
Coenie

Comments

Post a Comment

Popular posts from this blog

Reünie

Image
Dis 6uur Saterdagoggend – ek sit in my kantoor. Ek moet werk aan more-oggend se erediens. Gisteraand se Reünie maal in my kop. Ek het lanklaas so lekker gelag en ek het mense sien lag wat lanklaas gelag het. Dit was bevrydend. Ons het gelag vir die lewe, vir onsself, vir die ander mense. Lag doen ’n mens goed. Maar ek het ’n paar keer amper ook gehuil. Die reünie wat Dana Snyman beskryf en Frank Opperman so meesterlik opgevoer het, vertel vir ons iets van ons eie wêreld – ’n baie stukkende wêreld. Die prentjie van die verskillende mense by die reünie is ’n prentjie van ons eie wêreld – selfs van ons eie dorp. Dit ruk ons weg van die religieuse kerkwêreld waarin so maklik ’n kokon-betaan voer na ’n wêreld waar almal nie so “ok” is nie. Boesman se storie het my in die hart gegryp. Ek dra maandeliks by vir ’n fonds vir oud weermaglede, soos hy, wat nie kan “cope” nie. Sy taal en swetswoorde het my nie afgesit nie – dis hoe daardie manne praat. Die oorlog het hulle geleer om so te praat....
Read more

God se hande

God se hande ‭‭PSALMS‬ ‭89:14‬ "U het 'n magtige arm, sterk is u hand, kragtig u regterhand". Hande fassineer my. Ek kyk graag na mense se hande. Elke mens se hande lyk en voel anders. Soms vertel mense se hande iets van hulle lewensstorie. Mans wat met hulle hande werk, het dikwels groot, growwe hande. Musikante het dikwels fyner, sagter hande.  Ek sal nooit oom Jantjie se hande vergeet nie. Hy was diep in die tagtigs. Wanneer ek hom met die hand groet, het my hande weggeraak in sy reuse hande. Maar dit was die sagste hande wat ek ooit by 'n man gesien het. Liefdevolle hande. Oom Kinnie se hande was groot en sterk. Hy het vroeër in die myn gewerk en daarna met yster gewerk. Dit was sterk maar liefdevolle hande - hande wat jou laat veilig voel het. My ma se hande was krom en effens verwronge. Jare se artritis het haar klein sagte hande verander in ongemaklike, seer hande. Dit was hande wat hard gewerk het en alles vir haar kinders gedoen het. Die Bybel praat dikwels v...
Read more