Geskors vir 12 weke...

Vrydag refleksie - 5 Desember

Eben Etzebeth is vir 12 weke (12 wedstryde)  geskors. As 'n mens die publiek se kommentare lees, besef jy dat mense verskillende opinies het oor sy skorsing. Die feit van die saak is dat hy verkeerd was en dat hy 'n klomp wedstryde gaan mis as gevolg van een onbesonne oomblik. 'n Mens wil amper vra: was dit die moeite werd?

Ek lees hierdie week die hartseer verhaal van Marion James. Sy was die vinnigste vrou in die wêreld. Sy het by die Sydney Olimpiese Spele in 2000 goue medaljes gekry vir die 100m, 200m en die 4x400m aflos, asook brons vir verspring en ook die 4x100m aflos - drie goud en twee brons.

Na jare se ondersoeke het sy in 2008 erken dat sy verbode middels gebruik het en vir die federale ondersoekers gejok het. Sy het al haar medaljes verloor en ses maande tronkstraf gekry. Die vrou wat op 'n stadium die vinnigste vrou in die wêreld was, kon later in die tronk skaars loop.

Ek glo dat Marion James haar hare uit haar kop kon trek oor sekere besluite wat sy geneem het. Sy het 'n duur prys betaal. In haar eie woorde: "I have no-one to blame but myself for what I've done...Making the wrong choices and bad decisions can be disastrous."

Daar is 'n les te leer vir elkeen van ons. Een onbesonne oomblik of een dom besluit kan jou hele lewe verwoes. Vra maar vir Simson of die verhouding met Delila die moeite werd was - dit het altwee sy oë en sy lewe gekos (Rig 16). Of vra vir Ananias en Saffira watter prys hulle betaal het vir hulle oneerlikheid oor geld - hulle het alles (hulle lewens) verloor (Hand 5). Een onbesonne oomblik kan jou lewe verwoes.

Ons almal het waarskynlik iewers in ons lewens iets onbesonne aangevang. Dalk was jy gelukkig en het jy weggekom daarmee; dalk het jy 'n duur prys betaal daarvoor. Die kort en lank van alles is: dis nie die moeite werd nie - daar is te veel op die spel. Een verhouding kan jou huwelik kos; een klein bedraggie geld wat jy vat, kan jou werk kos; een woede-uitbarsting kan iemand se lewe kos - vra maar vir Moses wat in 'n onbesonne oomblik 'n Egiptenaar doodgeslaan het (Eks 2).

Die Spreuke-skrywer sê daar is 'n pad wat (op daardie oomblik?) vir die mens reg lyk maar die uiteinde daarvan is die dood (Spr 14:12 en 16:25). Dink mooi, bereken die koste, maak die regte keuse en leef reg...

Mooi dag!
Coenie

Comments

Post a Comment

Popular posts from this blog

Reünie

Image
Dis 6uur Saterdagoggend – ek sit in my kantoor. Ek moet werk aan more-oggend se erediens. Gisteraand se Reünie maal in my kop. Ek het lanklaas so lekker gelag en ek het mense sien lag wat lanklaas gelag het. Dit was bevrydend. Ons het gelag vir die lewe, vir onsself, vir die ander mense. Lag doen ’n mens goed. Maar ek het ’n paar keer amper ook gehuil. Die reünie wat Dana Snyman beskryf en Frank Opperman so meesterlik opgevoer het, vertel vir ons iets van ons eie wêreld – ’n baie stukkende wêreld. Die prentjie van die verskillende mense by die reünie is ’n prentjie van ons eie wêreld – selfs van ons eie dorp. Dit ruk ons weg van die religieuse kerkwêreld waarin so maklik ’n kokon-betaan voer na ’n wêreld waar almal nie so “ok” is nie. Boesman se storie het my in die hart gegryp. Ek dra maandeliks by vir ’n fonds vir oud weermaglede, soos hy, wat nie kan “cope” nie. Sy taal en swetswoorde het my nie afgesit nie – dis hoe daardie manne praat. Die oorlog het hulle geleer om so te praat....
Read more

God se hande

God se hande ‭‭PSALMS‬ ‭89:14‬ "U het 'n magtige arm, sterk is u hand, kragtig u regterhand". Hande fassineer my. Ek kyk graag na mense se hande. Elke mens se hande lyk en voel anders. Soms vertel mense se hande iets van hulle lewensstorie. Mans wat met hulle hande werk, het dikwels groot, growwe hande. Musikante het dikwels fyner, sagter hande.  Ek sal nooit oom Jantjie se hande vergeet nie. Hy was diep in die tagtigs. Wanneer ek hom met die hand groet, het my hande weggeraak in sy reuse hande. Maar dit was die sagste hande wat ek ooit by 'n man gesien het. Liefdevolle hande. Oom Kinnie se hande was groot en sterk. Hy het vroeër in die myn gewerk en daarna met yster gewerk. Dit was sterk maar liefdevolle hande - hande wat jou laat veilig voel het. My ma se hande was krom en effens verwronge. Jare se artritis het haar klein sagte hande verander in ongemaklike, seer hande. Dit was hande wat hard gewerk het en alles vir haar kinders gedoen het. Die Bybel praat dikwels v...
Read more