Nuwejaarsdag 2026

Dis Nuwejaarsdag, 1 Januarie 2026. Dit voel soos gister toe ons Alfa 1999 op TV gekyk het en gedink het dit is darem ver in die toekoms in. Nou is dit 27 jaar na Alfa 1999. Ons bly steeds op die aarde en sweef nie iewers in 'n ruimtestasie rond nie.

Dis natuurlik nie vir almal op dieselfde oomblik nuwejaar nie. Australië, Nieu-Seeland en die Ooste is al in die helfde van 1 Januarie; Amerika en Kanada moes nog 'n paar ure wag vir nuwejaar. Die Jode het hulle nuwejaar reeds in September gevier. Maar tegnies is dit vir ons 'n nuwe jaar in ons baan om die son.

Die groot vraag aan die begin van 'n nuwe jaar is: wat gaan hierdie jaar vir ons inhou? Gaan ons gelukkig wees? Gaan ons gesond wees? Gaan ons leef om te vertel? Gaan die oorlog tussen Rusland en Oekraïne hierdie jaar ophou? Wat gaan in ons eie land gebeur?

Ons het nie antwoorde op een van hierdie vrae nie. Ons sal moet wag en sien. Wat ons wél het, is 'n belofte dat die Here by ons sal wees. Ons gaan nie alleen wees nie. Maak nie saak wat gebeur nie, ons sal nie alleen wees nie. Jesus se belofte was: Ek is by julle al die dae tot aan die voleinding. Die Baba wat gebore is sal ook in hierdie jaar vir ons Immanuel wees. Daarom hoef ons nie nou besorg te wees oor alles nie (Fil 4:6).

Ons gaan die toekoms in met geloof, hoop en verwagting. Ons gaan die toekoms ook biddend in. Ons gee ons drome en vrese vir die Here. Ons maak ons begeertes "met smeking en danksegging" aan God bekend (Fil 4:6). 

Ons bid dat die Here ons sal seën en ons beskerm teen alle onheil en teenspoed. Ons glo Hy hoor; ons hou dit vas. En ten spyte van die onsekerheid en vrae sonder antwoorde, het ons 'n vrede wat alle verstand te bowe gaan (Fil 4:7).

Geseënde nuwe jaar! Mag die seëngebed van Aaron waar wees/word vir jou en jou huis (Num 6:24-26):

“Die Here sal julle seën en julle beskerm; die Here sal tot julle redding verskyn en julle genadig wees; die Here sal julle gebede verhoor en aan julle vrede gee!

Coenie, namens die leraars, personeel en kerkraad.

https://youtu.be/O5t97IvlExI?si=SpOHx3DrfOzeQpxp

Comments

Post a Comment

Popular posts from this blog

God se hande

God se hande ‭‭PSALMS‬ ‭89:14‬ "U het 'n magtige arm, sterk is u hand, kragtig u regterhand". Hande fassineer my. Ek kyk graag na mense se hande. Elke mens se hande lyk en voel anders. Soms vertel mense se hande iets van hulle lewensstorie. Mans wat met hulle hande werk, het dikwels groot, growwe hande. Musikante het dikwels fyner, sagter hande.  Ek sal nooit oom Jantjie se hande vergeet nie. Hy was diep in die tagtigs. Wanneer ek hom met die hand groet, het my hande weggeraak in sy reuse hande. Maar dit was die sagste hande wat ek ooit by 'n man gesien het. Liefdevolle hande. Oom Kinnie se hande was groot en sterk. Hy het vroeër in die myn gewerk en daarna met yster gewerk. Dit was sterk maar liefdevolle hande - hande wat jou laat veilig voel het. My ma se hande was krom en effens verwronge. Jare se artritis het haar klein sagte hande verander in ongemaklike, seer hande. Dit was hande wat hard gewerk het en alles vir haar kinders gedoen het. Die Bybel praat dikwels v...
Read more

Reünie

Image
Dis 6uur Saterdagoggend – ek sit in my kantoor. Ek moet werk aan more-oggend se erediens. Gisteraand se Reünie maal in my kop. Ek het lanklaas so lekker gelag en ek het mense sien lag wat lanklaas gelag het. Dit was bevrydend. Ons het gelag vir die lewe, vir onsself, vir die ander mense. Lag doen ’n mens goed. Maar ek het ’n paar keer amper ook gehuil. Die reünie wat Dana Snyman beskryf en Frank Opperman so meesterlik opgevoer het, vertel vir ons iets van ons eie wêreld – ’n baie stukkende wêreld. Die prentjie van die verskillende mense by die reünie is ’n prentjie van ons eie wêreld – selfs van ons eie dorp. Dit ruk ons weg van die religieuse kerkwêreld waarin so maklik ’n kokon-betaan voer na ’n wêreld waar almal nie so “ok” is nie. Boesman se storie het my in die hart gegryp. Ek dra maandeliks by vir ’n fonds vir oud weermaglede, soos hy, wat nie kan “cope” nie. Sy taal en swetswoorde het my nie afgesit nie – dis hoe daardie manne praat. Die oorlog het hulle geleer om so te praat....
Read more

In the ghetto

Dagstukkie - 8 Oktober Elvis Presley het in 1969 die lied "In the Ghetto" (geskryf deur Mac Davis) opgeneem. Die lied se titel was aanvanklik "The Vicious Circle".  Die lied vertel die verhaal van 'n ongewensde kind wat op 'n koue oggend in Chicago gebore is: sy ma wou hom nie gehad het nie. Die ghetto waarin hy gebore word, vertel die verhaal van armoede. Hy word groot in die strate en raak betrokke by misdaad. Uiteindelik pleeg Hy moord en word self ook doodgeskiet. Sy ma kry daarna weer 'n ongewensde baba -  op 'n koue oggend in Chicago. So gaan die tragiese siklus voort... Hierdie verhaal speel homself elke dag af in ons eie land, in Afrika en ander dele van die wêreld. Dis die dodelike siklus van armoede,  ongewensde of onverantwoordelike swangerskappe, kinderverwaarlosings, lewe op straat, bendes en uiteindelik lewensverliese. Die lied vertel van 'n ma wat nie haar kind wil hê nie. Sy huil as haar kind gebore word en sy huil as hy sterf; da...
Read more