'n Ark en 'n Mercedes

Vrydag refleksie - 2 Januarie

Vir 'n klompie goedgelowige Christene in Ghana was dit nie 'n lekker kersfees nie. Om die waarheid te sê: hulle is teleurgesteld en kwaad. Hulle het kaartjies gekoop om in die ark in te gaan voor die groot vloede wat op 25 Desember sou begin.

Een van die baie profete, wat homself as profeet verklaar het, het aanspraak gemaak daarop dat die Here vir Hom gewys het hier kom 'n tweede (sond)vloed en hy moet 'n ark bou. Hy het klaarblyklik genoeg kaartjies verkoop vir 8 arke. Maar die vloed het nie gekom nie en hy het vir homself 'n duur Mercedes motor gekoop uit die kaartjieverkope van die ark. 'n Mens kan maar net lag...of dalk eerder huil.

Soveel mense is al miskei deur dominees of pastore of profete wat vir hulleself meer gesag toe-eien as wat die Here vir hulle gegee het. Daar is groot rooiligte wat flilkker as mense meer gesag as die Bybel kry - maak nie saak hoe wonderlik hulle is nie. Paulus waarsku ons selfs teen mense wat allerhande visioene gesien het (Kol 2:18). 

Vir baie het die bediening 'n winsgewende besigheid geword. Hulle maak geld uit mense se vrese en krisisse. Hulle mislei mense vir geld. Hulle voorspel dinge wat nie van die Here af kom nie; hulle belowe dinge wat die Here nie belowe het nie. Die welvaartskerke in Amerika (en in ons eie land) groei teen 'n ongelooflike tempo omdat mense graag wil hoor dat almal welaf gaan wees; almal sal gesond word en almal sal oorvloedig geseën word.

Dis 'n valse evangelie. Almal word nie gesond nie; almal is nie suksesvol nie; almal word nie ryk nie. Die pad saam met God is nie altyd kort en reguit en maklik nie. Soms is die pad lank en moeilik. Soms is daar teleurstellings en onbeantwoorde gebede. Dis nie iets wat mense wil hoor nie.

Ons moet eerlik oor die Bybel en oor God wees. En gelowiges moenie alles glo wat hulle hoor nie - selfs nie van hul geliefde dominee, pastoor, sanger of profeet nie. En terloops, in die Bybelse verhaal van die sondvloed was daar nie kaartjies te koop nie. Genade word nie gekoop nie.

Mooi dag!
Coenie

Comments

Post a Comment

Popular posts from this blog

God se hande

God se hande ‭‭PSALMS‬ ‭89:14‬ "U het 'n magtige arm, sterk is u hand, kragtig u regterhand". Hande fassineer my. Ek kyk graag na mense se hande. Elke mens se hande lyk en voel anders. Soms vertel mense se hande iets van hulle lewensstorie. Mans wat met hulle hande werk, het dikwels groot, growwe hande. Musikante het dikwels fyner, sagter hande.  Ek sal nooit oom Jantjie se hande vergeet nie. Hy was diep in die tagtigs. Wanneer ek hom met die hand groet, het my hande weggeraak in sy reuse hande. Maar dit was die sagste hande wat ek ooit by 'n man gesien het. Liefdevolle hande. Oom Kinnie se hande was groot en sterk. Hy het vroeër in die myn gewerk en daarna met yster gewerk. Dit was sterk maar liefdevolle hande - hande wat jou laat veilig voel het. My ma se hande was krom en effens verwronge. Jare se artritis het haar klein sagte hande verander in ongemaklike, seer hande. Dit was hande wat hard gewerk het en alles vir haar kinders gedoen het. Die Bybel praat dikwels v...
Read more

Reünie

Image
Dis 6uur Saterdagoggend – ek sit in my kantoor. Ek moet werk aan more-oggend se erediens. Gisteraand se Reünie maal in my kop. Ek het lanklaas so lekker gelag en ek het mense sien lag wat lanklaas gelag het. Dit was bevrydend. Ons het gelag vir die lewe, vir onsself, vir die ander mense. Lag doen ’n mens goed. Maar ek het ’n paar keer amper ook gehuil. Die reünie wat Dana Snyman beskryf en Frank Opperman so meesterlik opgevoer het, vertel vir ons iets van ons eie wêreld – ’n baie stukkende wêreld. Die prentjie van die verskillende mense by die reünie is ’n prentjie van ons eie wêreld – selfs van ons eie dorp. Dit ruk ons weg van die religieuse kerkwêreld waarin so maklik ’n kokon-betaan voer na ’n wêreld waar almal nie so “ok” is nie. Boesman se storie het my in die hart gegryp. Ek dra maandeliks by vir ’n fonds vir oud weermaglede, soos hy, wat nie kan “cope” nie. Sy taal en swetswoorde het my nie afgesit nie – dis hoe daardie manne praat. Die oorlog het hulle geleer om so te praat....
Read more

In the ghetto

Dagstukkie - 8 Oktober Elvis Presley het in 1969 die lied "In the Ghetto" (geskryf deur Mac Davis) opgeneem. Die lied se titel was aanvanklik "The Vicious Circle".  Die lied vertel die verhaal van 'n ongewensde kind wat op 'n koue oggend in Chicago gebore is: sy ma wou hom nie gehad het nie. Die ghetto waarin hy gebore word, vertel die verhaal van armoede. Hy word groot in die strate en raak betrokke by misdaad. Uiteindelik pleeg Hy moord en word self ook doodgeskiet. Sy ma kry daarna weer 'n ongewensde baba -  op 'n koue oggend in Chicago. So gaan die tragiese siklus voort... Hierdie verhaal speel homself elke dag af in ons eie land, in Afrika en ander dele van die wêreld. Dis die dodelike siklus van armoede,  ongewensde of onverantwoordelike swangerskappe, kinderverwaarlosings, lewe op straat, bendes en uiteindelik lewensverliese. Die lied vertel van 'n ma wat nie haar kind wil hê nie. Sy huil as haar kind gebore word en sy huil as hy sterf; da...
Read more